भारतीय भाषाओं द्वारा ज्ञान

Knowledge through Indian Languages

Dictionary

Navakarnataka Vijnana Tantrajnana Padasampada (2011)

Navakarnataka Publications Private Limited

ಅಕ್ಷಿಸ್ನಾಯುವಾತ

(ವೈ) ಕಣ್ಣುಗುಡ್ಡೆಯನ್ನು ಚಲಿಸಲು ನೆರವಾಗುವ ಸ್ನಾಯುಗಳಿಗೆ ತಗುಲಿದ ಲಕ್ವಾ. ತತ್ಸಂಬಂಧ ನರಗಳು ಕ್ರಿಯಾಹೀನವಾಗುವುದೇ ಈ ಲಕ್ವಕ್ಕೆ ಕಾರಣ

ಅಕ್ಷೀಯ

(ಸಾ) ಅಕ್ಷಕ್ಕೆ ಸಂಬಂಧಿಸಿದ

ಅಖಂಡನೀಯ

(ರ) ಅಣುವನ್ನು ರಾಸಾಯನಿಕವಾಗಿ ವಿಚ್ಛಿದ್ರಗೊಳಿಸಲಾಗದ ಸ್ಥಿತಿ. (ವೈ) ಅಪರಿವರ್ತನೀಯ. ದೇಹದಲ್ಲಿ ಯಾವುದಾದರೂ ಒಂದು ಭಾಗ ಸ್ಥಾನಪಲ್ಲಟವಾಗಿದ್ದು, ಅದನ್ನು ಮೊದಲಿನ ಸ್ಥಿತಿಗೆ ತರಲಾಗದ ಸ್ಥಿತಿ. ಉದಾ : ಮುರಿದ ಕೆಲವು ಮೂಳೆ, ತಪ್ಪಿದ ಕೀಲು ಇತ್ಯಾದಿ

ಅಂಗ

(ಜೀ) ವಿಶೇಷ ರಚನೆಯುಳ್ಳದ್ದಾಗಿ, ವಿಶೇಷ ಕಾರ್ಯನಿರ್ವಹಿಸುವ ಮೂಲಕ ಇತರ ಭಾಗಗಳಿಂದ ಸ್ಪಷ್ಟವಾಗಿ ಮತ್ತು ಪ್ರತ್ಯೇಕವಾಗಿ ಎದ್ದುಕಾಣುವ ಪ್ರಾಣಿ/ಸಸ್ಯ ಶರೀರದ ಒಂದು ಭಾಗ. ಉದಾ: ಸಸ್ಯಗಳಲ್ಲಿ ಬೇರು, ಎಲೆ, ಹೂ ಹಾಗೂ ಪ್ರಾಣಿಗಳಲ್ಲಿ ಕಿವಿ, ಕಣ್ಣು, ಶ್ವಾಸಕೋಶಗಳು, ಮೂತ್ರಪಿಂಡಗಳು, ಹೃದಯ ಇತ್ಯಾದಿ. ನಿರ್ದಿಷ್ಟ ಅಂಗ. ಅನೇಕ ಭಿನ್ನ ಭಿನ್ನ ಊತಕಗಳಿಂದ ಕೂಡಿರುತ್ತದೆ

ಅಂಗಕ

(ಪ್ರಾ) ಸಸ್ಯದ ಅಥವಾ ಪ್ರಾಣಿಯ ಕೋಶ ದೊಳಗೆ ವಿಶಿಷ್ಟ ಕಾರ್ಯ ಜರಗಿಸುವ ಒಂದು ಸೂಕ್ಷ್ಮ ಸಂರಚನೆ. ನ್ಯೂಕ್ಲಿಯಸ್, ಮೈಟೊಕಾಂಡ್ರಿಯ ಹಾಗೂ ಲೈಸೋಸೋಮ್‌ಗಳು ಅಂಗಕಗಳಿಗೆ ನಿದರ್ಶನ

ಅಂಗಚ್ಛೇದನೆ

(ವೈ) ದೇಹದ ಹೊರಭಾಗವೊಂದನ್ನು ಕತ್ತರಿಸಿ ತೆಗೆಯುವುದು. ಉದಾ: ಬೆರಳು, ತೋಳು, ಕಾಲು, ಕಿವಿ ಮುಂತಾದವನ್ನು ಛೇದಿಸುವುದು

ಅಗತ್ಯ ಧಾತು

(ಜೀ) ಯಾವುದೇ ಜೀವಿಯ ಅಭಿವರ್ಧನೆ ಪುನರುತ್ಪಾದನೆಗಳಿಗೆ ಅವಶ್ಯವಾದ ಧಾತು. ಈ ಧಾತುವಿನ ಸ್ಥಳವನ್ನು ಮತ್ತೊಂದು ಧಾತು ಪಡೆಯಲಾರದು

ಅಂಗಮರ್ದನ

(ವೈ) ಚಿಕಿತ್ಸೆ ನೀಡುವ ಉದ್ದೇಶದಿಂದ ಶರೀರದ ಸ್ನಾಯುಗಳನ್ನೂ ಅಸ್ಥಿಸಂಧಿಗಳನ್ನೂ ಅವುಗಳ ಕಾರ್ಯ ಚುರುಕಾಗುವಂತೆ ಕೈಯಿಂದ ಇಲ್ಲವೇ ಸಲಕರಣೆಯಿಂದ ನೀವುವುದು, ಉಜ್ಜುವುದು, ಹಿಸುಕುವುದು ಅಥವಾ ತಟ್ಟುವುದು. ಮಾಲೀಸು. ಸಂವಾಹನ

ಅಂಗರಚನಾವಿಜ್ಞಾನ

(ಜೀ,ವೈ) ಜೀವಿಗಳ, ವಿಶೇಷವಾಗಿ ಮಾನವನ, ದೇಹರಚನೆ ಕುರಿತ ಅಧ್ಯಯನ. ಜೀವಿಗಳ ಭೌತರಚನೆ ಅರಿಯುವ ಸಲುವಾಗಿ ಅವನ್ನು ಛೇದಿಸಲಾಗುತ್ತದೆ

ಅಗಲ ತಂತುಕಟ್ಟು

(ವೈ) ಗರ್ಭಾಶಯದ ಬದಿಗಳಿಂದ ವಸ್ತಿ ಕುಹರದ ಬದಿಗಳಿಗೆ ವ್ಯಾಪಿಸಿರುವ ಎರಡು ಪಟ್ಟಿಗಳ ಪೈಕಿ ಒಂದು

ಅಂಗವಿಕಾಸ

(ವೈ) ಭ್ರೂಣ ಬೆಳವಣಿಗೆಯ ಆದಿಯಲ್ಲಿ ಜೀವಕೋಶ ಹಾಗೂ ಊತಕಗಳ ವಿಭೇದನ ಪ್ರಕ್ರಿಯೆ ನಡೆದು, ಯಾವ ಜೀವಕೋಶ/ಊತಕ ಯಾವ ಅಂಗವಾಗಿ ಬೆಳೆದು ಪರಿಪೂರ್ಣ ರೂಪವನ್ನು ಪಡೆಯಬೇಕು ಎಂಬುದರ ನಿರ್ಣಯವು ಈ ಹಂತದಲ್ಲಿ ನಡೆದು, ಅದರಂತೆ ಅವು ಬೆಳೆಯುತ್ತವೆ. ಆಕೃತಿ ವಿಕಾಸ. ಅಂಗರಚನ ವಿಕಾಸ. ರೂಪವಿಕಾಸ. ರೂಪೋತ್ಪತ್ತಿ

ಅಂಗವಿಚ್ಛೇದನ

(ವೈ) ಅಂಗರಚನೆಯ ಅಧ್ಯಯನಕ್ಕಾಗಿ ಜೀವಿಯನ್ನು ಕತ್ತರಿಸುವ ಪ್ರಕ್ರಿಯೆ

ಅಗಸೆ

(ಸ) ಪ್ಯಾಪಿಲಿಯೊನೇಸೀ ಕುಟುಂಬಕ್ಕೆ ಸೇರಿದ ಸಸ್ಯ. ಇದರ ಎಲೆ, ಹೂ, ಕಾಯಿಯನ್ನು ಅಡುಗೆಗೂ, ತೊಗಟೆ ಹಾಗೂ ಎಲೆಯನ್ನು ಔಷಧಕ್ಕೂ ಉಪಯೋಗಿಸುತ್ತಾರೆ

ಅಗಸೆ ಎಣ್ಣೆ

(ಸ) ನಾರಗಸೆಯ ಬೀಜದಿಂದ ತೆಗೆದ ಎಣ್ಣೆ. ಇದರಲ್ಲಿ ಒಲಿಯಿಕ್ ಮತ್ತಿತರ ಅಪರ್ಯಾಪ್ತ ಆಮ್ಲಗಳ ಘನ ಹಾಗೂ ದ್ರವ ಗ್ಲಿಸರೈಡುಗಳಿರುತ್ತವೆ. ಇದರ ಅಯೊಡೀನ್

ಅಗಸೆನಾರು

(ಸ) ಲೈನೇಸೀ ಕುಟುಂಬ, ಲೈನಮ್ ಯುಸಿಟಾಟಿಸಿ ಮಮ್ ಜಾತಿಗೆ ಸೇರಿದ, ಸಮಶೀತೋಷ್ಣವಲಯದಲ್ಲಿ ನಾರಿಗಾಗಿ ಬೆಳೆಯುವ ಸಸ್ಯ. ಇದರ ಬೀಜದಿಂದ (ಲೀನ್‌ಸೀಡ್) ಎಣ್ಣೆ ತೆಗೆಯುತ್ತಾರೆ. ಹಿಂಡಿ ಮೇವಾಗಿ ಉಪಯುಕ್ತ. ನಾರಗಸೆ

ಅಂಗಾಕರ್ಷಿತ

(ಪ್ರಾ, ವೈ) ರಾಸಾಯನಿಕಗಳು, ಔಷಧಗಳು ಹಾಗೂ ಕ್ರಿಮಿಗಳು ಕೆಲವು ಸಲ ಒಂದು ನಿರ್ದಿಷ್ಟ ಅಂಗದತ್ತ ಒಲವನ್ನು ತೋರಿ ಆ ಕಡೆಯೇ ಸಾಗಿ ಅಲ್ಲಿ ಸಂಗ್ರಹ ಆಗುವಿಕೆ. ಅಂಗಸ್ನೇಹಿ

ಅಗಾಧ

(ಭೂವಿ) ಸುಮಾರು ೪,೦೦೦-೬,೦೦೦ ಮೀ. ಆಳದಲ್ಲಿ ಸಾಗರತಲ ಪರಿಸರ ಕುರಿತ. ನೋಡಿ: ತೀರಾವಳಿ (ಸುಮಾರು ೨೦೦ ಮೀ. ಆಳ), ಗಭೀರ (ಸುಮಾರು ೨೦೦-೪೦೦೦ ಮೀ. ಆಳ)

ಅಗಾಧ ನಿಕ್ಷೇಪಗಳು

(ಭೂವಿ) ಸಾಗರದಲ್ಲಿ ೨೦೦೦ ಮೀ.ಗಿಂತಲೂ ಹೆಚ್ಚಿನ ಆಳಗಳಲ್ಲಿ ಕ್ರಮೇಣ ಮೈದಳೆಯುವ ಅವಸಾದನ ನಿಕ್ಷೇಪಗಳು

ಅಗಾರಿಕ್

(ಸ) ಕೊಡೆಯಂಥ ಅಗ್ರಭಾಗ ಮತ್ತು ಅದರ ಕೆಳ ಮೈಯಲ್ಲಿ ಕಿವಿರುಗಳು ಇರುವ ಶಿಲೀಂಧ್ರಗಳ ಪೈಕಿ ಯಾವುದೇ ಒಂದು. ಉದಾ: ನಾಯಿಕೊಡೆ, ಅಣಬೆ

ಅಂಗಾಲು

(ಪ್ರಾ) ಉನ್ನತ ವರ್ಗದ ಪ್ರಾಣಿಗಳಲ್ಲಿ ಕಾಲಿನ ತಳಭಾಗ

Search Dictionaries

Loading Results

Follow Us :   
  Download Bharatavani App
  Bharatavani Windows App